E nu pizirru
scurri
notti e ghiuornu
ra sta vecchia
funtana
nnanti a chiesa.
Quanti sicchia
quanti quarticeddi
vucchi assitati
e stanchi
ha cunzulatu
stu funtaninu
ccu chist’acqua
frisca!
‘Na vota,
stu mutivu a sira tarda
quannu ccu na chitarra sutt’o vrazzu
si nni scinnia
a Chiusa
u nnammuratu,
e u vicchiarieddu
ra li Rungi stancu
ccu ciucciarieddu
carricu ri scupi,
m’annacava…
Eru ngopp’o gralu ra porta
nzinu a dda vecchia mia,
addu finianu
l’urtimi sigliuzza
zucannu
nu cumbiettu
ri cannella.
Alessandro Pinto
